هموم ناس ....عايزة تعيش

القصة الاولى

قعدت النهاردة مع واحد من عمال يومية صنايعى فى الحدادة بكلم معاه لقيتة مثقف جدا وواعى سياسيا واجتماعيا مع انه متعلمش وتكلمت معاه عن الثورة قالى انا نفسى اروح الميدان ولكن ازاى اروح واعتصم ومعرفش اكل عيالى عشان بشتغل باليومية بس هى اللى بيعرف يصرف فيها على البيت يعنى اللى جى على قد اللى رايح وقوتلة الناس والشعب اللى فى التحرير مهندسين وموظفين وناس محترمة راح قالى: انا نفسى الثوار التحرير يبصو لينا شوية يعنى هما مكانا عشان قدرين يعتصموا لكن انا مقدرش اروح اعتصم عشان بشتغل يوم بيوم وبيعتبى جدا ونفسة يكون لية شغل ثابت وشأن والناس والحكومة تحترمهم وتعملهم نقابة او مرتب شهرى معاش على الاقل وبيقولى الناس تعبت اوى ماديا ونفسيا ، واتكلمت عن البرلمان والاخوان والسلفيين ازاى نطو وطلعوا كدة من غفلتهم ودخلوا البرلمان ع الجاهز قلى الناس دول لو محققوش مطالب الناس البسيطة اللى زينا هيتعمل عليهم ثورة بجد وقالتة :لو واحد منهم شاف زوجتك مش لابسة حجاب او نقاب هيقول عليك كافر وكدة قالى : انا حر وهو يعمل بدينة الاول  قبل ما يحكم على غيرة وهى دى الديمقراطية ، اتبطست جدا من طريقة تفكيرة وحوارة .

وواحد تانى كلمنى راجل محترم وغلبان بيقولى فى موضوع كنيسة اطفيح انه نزل مخصوص سوهاج اشتغل فى الكنيسة وطلع بطاقتة للامن واستغربوا انه مسلم راح قالهم انا بعمل خير قالولة : انت مش هتاخد فلوس .قالهم مش مهم انا بعمل لله (لاتعليق) طول عمرنا عايشين بناكل طبق واحد ونهزر وكل حاجة ميجوش ناس زى دول ولاد الكلب يوقعوا بنا.

وبيوقلى نفس انزل التحرير بس عشان بيشتغل باليومية مش قادر انزل واعتصم  

القصة الثانية

بكالوريوس علوم قسم كيمياء يعمل...حارس أمن

تصادفت ان اتعرف لشاب بالثلاثين من عمره يعمل بمستشفى بوسط القاهرة ولدية زوجه وابنتان وحكى لى ماساته التى قال عنها ان يتمنى من الثورة ان تعيشة حياة كريمة له ولاولادة ، فهو كان يعمل بحرفة الحفر على النحاس بخان الخليلى وكان يعمل بمهارة وحرفية ومحب لعمله ولكن بعد احداث الثورة وانخفاض معدلات السياحة فتم تسريحة من العمل واراد الله ان يعمل بمهنة حارس الامن الى ان تتحسن الظروف وقالى لى هذا وهو يبكى وحزين على حاله وحال البلد واخذ يسب ويلعن مبارك لانه هو السبب فى حاله وحال الالاف الشباب مثلة

احنا بتوع التحرير يا اخونا

اليوم يمر على ثورتنا المجيدة السلمية سنة بالتمام والكمال ولاشى تغير الا استشهاد اعداد كثيرة من المصريين فى ظل المرحلة الانتقالية (الانتقامية) التى مرت بها مصر الفترة الحالية من حكم العسكر والمنظومة التى لم تتغيرحتى الان ةتفكيرهم ذو الامر والتنفيذ دون تفكير فى القرار ، دة لو هما بيقولو بيحموا الثورة مكنوش داسو على الاقباط فى ماسبيرو واستشهاد مينا دانيال بقذيفة من الاسطح المجاورة لمبنى ماسبيرو او استشهاد الشيخ عماد عفت فى احداث مجلس الوزاء وغيرهم او مكشفوش عذرية فى 9 مارس او كانو حاكمو على مبارك و100 حرامية بالاعدام ،وتطلع امس المشير بوجهة البهى ليقول لنا تم الغاء حالة الطوارى يوم 25 يناير وبعد مقولتة هذة تم القبض على شابين وهما يوزعون بيان ضد المجلس وبراءة الناشط مايكل سند تحت الضغط عليه ....

تذكرت مشهد بل مشاهد الفيلم الذى يصور الواقع المرير فى السبعينات القرن الماضى وهو احنا بتوع الاتوبيس ،لان الذى يحدث الان هو فعلا بس كلاكيت تانى مرة فى 2011 لانة عندما يقولون عن ثوار التحرير انهم بلطجية وخارجين عن القانون بس محدش طابع فى ذاكرتة اننا منذ حدثت الثورة نقول سلمية سلمية .

يعنى يبعتوا البلطجية ويندسو بين الثوار ويعملوا العملة ويلبسوها فى الثوار ومين الثوار المهندس والدكتور والموظف والطالب والعامل مش دول ولاد ناس زى خالد سعيد ومينا دانيال ولا اية .

وبعدين مطالبنا ليست فئوية بل هى شرعية ولكن لايوجد اذان صاغية لنا والمفروض عجلة الانتاج الفكرى بتعهم تسرع فى المطالب واخص بالذكر بالذات جهاز الدخلية والمجلس العسكرى.وكفاية حكم عسكر بقى

والمشكلة يقولون عجلة الانتاج متوقفة ومن امتى كان فى اصلا عجلة دة لو فى سلحفة كان احسن

المهم مش هنبعد بعيد اصل الاعتصمات بصوا على المفيد من الاساس فى التباطو لمحاكمة الفاسدين يعنى مبارك وشلتة واللى بيلعب من تحت لتحت اللى يعنى بيبعت بلطجية لتشوية صورة الثوار وبعدين احنا جابنا من الاخر اخرنا 6 شهور ومفيش حاجة لا تعينيات ولا زيادة مرتبات ولا رقابة على السوق ولا حتى مواصلات عدلة دة حتى المياة مش لقينها دة ينفع يجماعة a7a يعنى معلش انا اتخنقت يعنى انا كل يوم بروح الشغل وبدى الشغل اكتر من حقة بشويتين ومش شايف اى تغيير امال الشباب اللى اتخنقت وبيموتوا وهم مسافرين برة فى البحر مش حرام .

انا عايز الجيل الجاى من الشباب والاطفال يشموا نفسهم بتعليم وصحة وحرية الراى كويس ونكون زى الدول المتقدمة (الله يحرق ايامك ياللى فى بالى) والاهالى ميستخسروش فيهم اى حاجة ولا يستقلوا بيهم ذينا كدة حرام بقى

مش مهم احنا جيل الثمانينات خلاص احنا نزرع وجيل التسعينات والالفية هما اللى يحصدو و مينسوش المعروف بتعنا .... الثورة مستمرة

والشعب فوق الشرطة وفوق الجيش كمان يعنى المعادلة الاتية :

بما ان الشعب هو الذى المفروض يدير البلد

اذن الجيش والشرطة منهم

وبما ان الشعب يريد تغيير

اذن الجيش والشرطة يمشوا وراه

اذن الشعب فوق الجيش والشرطة وهو المطلوب اثباته

افهموا بقى

احنا بتوع التحرير ي اخونا

يسقط يسقط حكم العسكر

25-1-2012

عيد ميلادى